టీడీపీ నూతన కార్యవర్గ ప్రమాణ స్వీకారం: పాల్గొన్న ఎమ్మెల్సీ మర్రి రాజశేఖర్.

మంగళగిరి: తెలుగుదేశం పార్టీ కేంద్ర కార్యాలయంలో జాతీయ, రాష్ట్ర కార్యవర్గాల ప్రమాణ స్వీకార మహోత్సవం అత్యంత ఘనంగా జరిగింది. పార్టీ ...

మంగళగిరి: తెలుగుదేశం పార్టీ కేంద్ర కార్యాలయంలో జాతీయ, రాష్ట్ర కార్యవర్గాల ప్రమాణ స్వీకార మహోత్సవం అత్యంత ఘనంగా జరిగింది. పార్టీ ప్రత్యేక ఆహ్వానం మేరకు శాసనమండలి సభ్యులు మర్రి రాజశేఖర్ ఈ కార్యక్రమంలో పాల్గొన్నారు. ముఖ్యమంత్రి, పార్టీ జాతీయ అధ్యక్షులు నారా చంద్రబాబు నాయుడు ముఖ్యఅతిథిగా హాజరైన ఈ వేడుకలో, కార్యనిర్వాహక అధ్యక్షులుగా మంత్రి నారా లోకేష్, పొలిట్ బ్యూరో ప్రత్యేక ఆహ్వానితులుగా నరసరావుపేట ఎంపీ లావు శ్రీకృష్ణదేవరాయలు ప్రమాణ స్వీకారం చేశారు. బాధ్యతలు చేపట్టిన వారితో పాటు నూతన కార్యవర్గ సభ్యులందరికీ మర్రి రాజశేఖర్ అభినందనలు తెలియజేస్తూ, పార్టీ బలోపేతానికి ఈ టీమ్ విజయవంతంగా కృషి చేయాలని ఆకాంక్షించారు.

రాష్ట్ర అభివృద్ధి ఒక యజ్ఞం: చంద్రబాబు నాయుడు.

ఈ సందర్భంగా ముఖ్యమంత్రి చంద్రబాబు నాయుడు మాట్లాడుతూ కీలక వ్యాఖ్యలు చేశారు. "రాష్ట్ర అభివృద్ధి కోసం నేను ఒక యజ్ఞం చేస్తుంటే, కొందరు రాక్షసుల్లా దానిని భగ్నం చేయాలని చూస్తున్నారు. 2024 ఎన్నికల్లో ప్రజలు మనకు 94 శాతం స్ట్రైక్ రేట్ ఇచ్చి చరిత్ర సృష్టించారు. కనీసం ప్రతిపక్ష హోదా కూడా దక్కనివ్వలేదంటే అది ప్రజల తీర్పు," అని పేర్కొన్నారు. పార్టీలో క్రమశిక్షణే ప్రధానమని, కార్యకర్తలే పార్టీకి అసలైన అధినేతలని ఆయన కొనియాడారు. రాబోయే స్థానిక సంస్థల ఎన్నికల్లో 2024 కంటే ఎక్కువ ఓట్ల శాతం సాధించాలని శ్రేణులకు పిలుపునిచ్చారు.

ఎంపీ లావు శ్రీకృష్ణదేవరాయలకు జన్మదిన శుభాకాంక్షలు..

ఇదే వేదికపై నరసరావుపేట ఎంపీ, పార్లమెంటరీ పార్టీ నేత లావు శ్రీకృష్ణదేవరాయలు జన్మదిన వేడుకలు కూడా జరిగాయి. ఎమ్మెల్సీ మర్రి రాజశేఖర్ ఆయనకు హృదయపూర్వక జన్మదిన శుభాకాంక్షలు తెలియజేశారు. భవిష్యత్తులో శ్రీకృష్ణదేవరాయలు మరిన్ని ఉన్నత పదవులు అధిరోహించి, ప్రజాసేవలో విశిష్ట గుర్తింపు పొందాలని ఆయన ఆకాంక్షించారు.